ಬೆಂಗಳೂರು: ಭಾರತದಲ್ಲಿ ಪ್ರತಿವರ್ಷ ಅಂದಾಜು 30.16 ಲಕ್ಷ ಶಿಶುಗಳು ಅವಧಿಪೂರ್ವವಾಗಿ ಜನಿಸುತ್ತಿದ್ದು, ವಿಶ್ವದಲ್ಲೇ ಅತಿ ಹೆಚ್ಚು ಅವಧಿಪೂರ್ವ ಜನನಗಳು ದಾಖಲಾಗುವ ದೇಶ ಭಾರತವಾಗಿದೆ. ರಾಷ್ಟ್ರೀಯ ಕುಟುಂಬ ಆರೋಗ್ಯ ಸಮೀಕ್ಷೆ-5 (NFHS-5, 2019-21) ಪ್ರಕಾರ, ಭಾರತದಲ್ಲಿ ಜೀವಂತ ಜನನಗಳಲ್ಲಿ ಸುಮಾರು **ಶೇ.12ರಷ್ಟು ಶಿಶುಗಳು ಅವಧಿಪೂರ್ವವಾಗಿ ಜನಿಸುತ್ತಿದ್ದು, ಪ್ರತಿ 8 ಶಿಶುಗಳಲ್ಲಿ ಸುಮಾರು ಒಂದು ಶಿಶು ಅವಿಧಿ ಪೂರ್ವ ಜನಿಸುತ್ತಿದೆ.
ಈ ಬಗ್ಗೆ ಮಾತನಾಡಿದ ಡಾ. ಶಿವಶಂಕರ್ ದಿಗ್ಗಿಕರ್ ಮೆಡಿಕವರ್ ಆಸ್ಪತ್ರೆ, ಹೂಡಿ, ಬೆಂಗಳೂರಿನ ಹಿರಿಯ ಮಕ್ಕಳ ತಜ್ಞ, ಇತ್ತೀಚಿಗೆ ಮೆಡಿಕವರ್ ಆಸ್ಪತ್ರೆಯಲ್ಲಿ ಹಲವು ಅವಧಿ ಪೂರ್ವ ಮಕ್ಕಳ ಜನನವಾಗಿದೆ. ಅವಧಿಪೂರ್ವವಾಗಿ ಜನಿಸಿದ ಪ್ರತಿಯೊಂದು ಶಿಶುವಿಗೂ ಸೂಕ್ತ ಸಮಯದಲ್ಲಿ ಸೂಕ್ತ ವೈದ್ಯಕೀಯ ಆರೈಕೆ ದೊರೆಯುವುದು ಅತ್ಯಂತ ಮುಖ್ಯ. ಅವಧಿಪೂರ್ವ ಜನನ ಎಂದರೆ ಮಗುವಿನ ಭವಿಷ್ಯ ಕೆಟ್ಟದ್ದೇ ಎಂದು ಅರ್ಥವಲ್ಲ. ಸರಿಯಾದ ನವಜಾತ ಶಿಶು ಆರೈಕೆ, ಪೌಷ್ಟಿಕತೆ, ಕಾಂಗರೂ ಮದರ್ ಕೇರ್ ಮತ್ತು ನಿಯಮಿತ ಫಾಲೋ-ಅಪ್ ಮೂಲಕ ಅನೇಕ ಅವಧಿಪೂರ್ವ ಶಿಶುಗಳು ಆರೋಗ್ಯಕರವಾಗಿ ಬೆಳೆಯಲು ಸಾಧ್ಯವಿದೆ,” ಎಂದು ಹೇಳಿದರು.
ಅವಧಿಪೂರ್ವ ಜನನಕ್ಕೆ ಹಲವು ಕಾರಣಗಳು
ಕಳೆದ ಎರಡು ದಶಕಗಳಲ್ಲಿ ಅವಧಿಪೂರ್ವ ಜನನಕ್ಕೆ ಕಾರಣವಾಗಬಹುದಾದ ಹಲವು ಅಂಶಗಳು ಕಂಡುಬಂದಿವೆ. 35 ವರ್ಷಕ್ಕಿಂತ ಹೆಚ್ಚಿನ ವಯಸ್ಸಿನಲ್ಲಿ ಗರ್ಭಧಾರಣೆ, ಹದಿಹರೆಯದ ಗರ್ಭಧಾರಣೆ, IVF/ART ಮೂಲಕ ಗರ್ಭಧಾರಣೆ, ಅವಳಿ ಅಥವಾ ಬಹುಶಿಶುಗಳ ಗರ್ಭಧಾರಣೆ, ಗರ್ಭಾವಸ್ಥೆಯ ಮಧುಮೇಹ, ಅಧಿಕ ರಕ್ತದೊತ್ತಡ, ಪ್ರೀ-ಎಕ್ಲಾಂಪ್ಸಿಯಾ, ಬೊಜ್ಜು ಹಾಗೂ ಥೈರಾಯ್ಡ್ ಸಮಸ್ಯೆಗಳು ಪ್ರಮುಖ ಅಂಶಗಳಾಗಿವೆ.
ಇದರ ಜೊತೆಗೆ ತಾಯಂದಿರಲ್ಲಿ ರಕ್ತಹೀನತೆ ಮತ್ತು ಅಪೌಷ್ಟಿಕತೆ, ಎರಡು ಗರ್ಭಧಾರಣೆಗಳ ನಡುವಿನ ಕಡಿಮೆ ಅಂತರ, ಅಸಮರ್ಪಕ ಪ್ರಸವಪೂರ್ವ ಆರೈಕೆ ಹಾಗೂ ಕೆಲವು ವೈದ್ಯಕೀಯ ಕಾರಣಗಳಿಂದ ಅವಧಿಗೂ ಮುನ್ನ ಹೆರಿಗೆ ಮಾಡಿಸಬೇಕಾದ ಸಂದರ್ಭಗಳೂ ಅವಧಿಪೂರ್ವ ಜನನದ ಮೇಲೆ ಪರಿಣಾಮ ಬೀರುತ್ತವೆ.
ಡಾ. ಶಿವಶಂಕರ್ ದಿಗ್ಗಿಕರ್ ಅವರು, “ಗರ್ಭಧಾರಣೆಯ ಆರಂಭದಿಂದಲೇ ನಿಯಮಿತ ಪ್ರಸವಪೂರ್ವ ತಪಾಸಣೆ ಮಾಡಿಸಿಕೊಳ್ಳುವುದು ಬಹಳ ಮುಖ್ಯ. ತಾಯಿಯಲ್ಲಿ ರಕ್ತಹೀನತೆ, ಅಧಿಕ ರಕ್ತದೊತ್ತಡ, ಮಧುಮೇಹ ಅಥವಾ ಇತರ ಆರೋಗ್ಯ ಸಮಸ್ಯೆಗಳಿದ್ದರೆ ಅವುಗಳನ್ನು ವೈದ್ಯರ ಸಲಹೆಯಂತೆ ನಿಯಂತ್ರಣದಲ್ಲಿಡಬೇಕು. ಇದರಿಂದ ತಾಯಿ ಮತ್ತು ಮಗುವಿನ ಆರೋಗ್ಯದ ಮೇಲೆ ಉಂಟಾಗಬಹುದಾದ ಅಪಾಯಗಳನ್ನು ಕಡಿಮೆ ಮಾಡಲು ಸಾಧ್ಯವಾಗುತ್ತದೆ,” ಎಂದು ತಿಳಿಸಿದರು.
“ಅವಧಿಪೂರ್ವ ಮಗುವನ್ನು ಮನೆಗೆ ಕರೆದುಕೊಂಡು ಬಂದ ನಂತರವೂ ಪೋಷಕರು ಹೆಚ್ಚಿನ ಗಮನ ನೀಡಬೇಕು. ಮಗುವಿನ ತೂಕ ಮತ್ತು ಬೆಳವಣಿಗೆಯನ್ನು ನಿಯಮಿತವಾಗಿ ಪರಿಶೀಲಿಸುವುದು, ವೈದ್ಯರ ಸಲಹೆಯಂತೆ ಲಸಿಕೆಗಳನ್ನು ನೀಡುವುದು, ಕಣ್ಣು ಮತ್ತು ಶ್ರವಣ ಪರೀಕ್ಷೆಗಳನ್ನು ಮಾಡಿಸುವುದು ಹಾಗೂ ಮಗುವಿನ ಬೆಳವಣಿಗೆಯ ಹಂತಗಳನ್ನು ಗಮನಿಸುವುದು ಅತ್ಯಗತ್ಯ.
ಈ ಲಕ್ಷಣಗಳು ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ
ಅವಧಿಪೂರ್ವ ಶಿಶುವಿನಲ್ಲಿ ಹಾಲು ಸರಿಯಾಗಿ ಕುಡಿಯದಿರುವುದು ಅಥವಾ ಹಾಲು ನಿರಾಕರಿಸುವುದು, ಅತಿಯಾದ ನಿದ್ರೆ ಅಥವಾ ಜಡತ್ವ, ದೇಹ ತಣ್ಣಗಾಗುವುದು, ವೇಗವಾಗಿ ಅಥವಾ ಕಷ್ಟಪಟ್ಟು ಉಸಿರಾಡುವುದು, ಚರ್ಮ ಹಳದಿಯಾಗುವುದು ಅಥವಾ ಜ್ವರ ಕಾಣಿಸಿಕೊಳ್ಳುವುದು ಮುಂತಾದ ಲಕ್ಷಣಗಳನ್ನು ಪೋಷಕರು ನಿರ್ಲಕ್ಷಿಸಬಾರದು. ಇಂತಹ ಸಂದರ್ಭಗಳಲ್ಲಿ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು.
ಗರ್ಭಧಾರಣೆಯಿಂದಲೇ ತಡೆಗಟ್ಟುವಿಕೆ ಆರಂಭ
ಅವಧಿಪೂರ್ವ ಜನನದ ಅಪಾಯವನ್ನು ಕಡಿಮೆ ಮಾಡಲು ಗರ್ಭಧಾರಣೆಗೆ ಮುನ್ನ ಮತ್ತು ಗರ್ಭಾವಸ್ಥೆಯಲ್ಲಿಯೇ ಅಗತ್ಯ ಮುನ್ನೆಚ್ಚರಿಕೆಗಳನ್ನು ಕೈಗೊಳ್ಳಬೇಕು. ನಿಯಮಿತ ಪ್ರಸವಪೂರ್ವ ತಪಾಸಣೆ, ರಕ್ತಹೀನತೆಗೆ ಚಿಕಿತ್ಸೆ, ಸೋಂಕುಗಳಿಗೆ ಸೂಕ್ತ ಚಿಕಿತ್ಸೆ, ತಂಬಾಕು ಮತ್ತು ಮದ್ಯಪಾನದಿಂದ ದೂರವಿರುವುದು ಹಾಗೂ ಗರ್ಭಧಾರಣೆಗಳ ನಡುವೆ ಕನಿಷ್ಠ ಎರಡು ವರ್ಷಗಳ ಅಂತರ ಕಾಪಾಡುವುದು ಸಹಾಯಕವಾಗಬಹುದು.
“ಪೋಷಕರು ಅವಧಿಪೂರ್ವ ಜನನದ ಬಗ್ಗೆ ಭಯಪಡುವುದಕ್ಕಿಂತ, ಸರಿಯಾದ ಸಮಯದಲ್ಲಿ ಸೂಕ್ತ ವೈದ್ಯಕೀಯ ಆರೈಕೆ ಪಡೆಯುವುದಕ್ಕೆ ಆದ್ಯತೆ ನೀಡಬೇಕು. ಗರ್ಭಾವಸ್ಥೆಯ ನಿಯಮಿತ ತಪಾಸಣೆ, ಅಪಾಯದ ಗರ್ಭಧಾರಣೆಯ ಆರಂಭಿಕ ಗುರುತಿಸುವಿಕೆ ಮತ್ತು ಮಗುವಿನ ಜನನದ ನಂತರ ಸೂಕ್ತ ನವಜಾತ ಶಿಶು ಆರೈಕೆ—ಇವು ಮಗುವಿನ ಆರೋಗ್ಯಕರ ಬೆಳವಣಿಗೆಗೆ ಬಹಳ ಮುಖ್ಯ.”
ಮೆಡಿಕವರ್ ಆಸ್ಪತ್ರೆ, ಹೂಡಿ, ಬೆಂಗಳೂರು ವತಿಯಿಂದ ಅವಧಿಪೂರ್ವ ಶಿಶುಗಳ ಆರೈಕೆ ಕುರಿತು ಪೋಷಕರು ಮತ್ತು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವುದು ಹಾಗೂ ಅಗತ್ಯವಿರುವ ಸಂದರ್ಭದಲ್ಲಿ ಸೂಕ್ತ ವೈದ್ಯಕೀಯ ಆರೈಕೆ ಪಡೆಯಲು ಉತ್ತೇಜಿಸುವುದು ಪ್ರಮುಖ ಉದ್ದೇಶವಾಗಿದೆ.
Leave a Reply